साँफेबगर ।
लैंगिक हिंसा विरुद्धको १६ दिने अभियान अन्तरगत सडक नाटक प्रतियोगिता गरिएको छ । अछामको साँफेबगर नगरपालिका वडा नम्बर १० घुघुरकोटमा उक्त प्रतियोगिता भएको हो ।
घुघुरकोट वडा स्तरिय महिला सञ्जालको आयोजना, वडा कार्यालयको समन्वय, वाक नेपाल, समविकास र डब्लूएचएच नेपालको आर्थिक सहयोगमा प्रतियोगिता सम्पन्न भएको थियो ।
वडामा रहेका नौवटै टोलका आत्मनिर्भर समुहमा आवद्ध महिला समुहहरुको प्रतियोगितामा सहभागिता रहेको थियो । प्रतियोगितामा सहभागि समुहहरुले बाल बिबाह, बहुविवाह, छाउपडी कुप्रथा, घरेलु हिंसा न्यूनीकरण गर्न सबैको भूमिका महत्वपूर्ण हुने, पोषणमा सुधार गर्नु पर्ने सडक नाटक मार्फत सन्देश दिईएको थियो । यस्तै लागू औषध सेवन गर्नु हुँदैन, छोराछोरी बिच विभेद गर्नु हुँदैन भन्ने सन्देश पनि दिएका थिए ।
प्रतियोगितामा प्रथम हुने समुहलाई तीन हजार, द्धितिय हुनेलाई दुई हजार पाँच सय, तृतिय हुनेलाई दुई हजार रुपैयाँ, सान्त्वना हुनेलाई एक हजार पाँच सय र अन्य सबै सहभागि समुहलाई पाँच सय रुपैयाँका दरले पुरस्कार समेत दिईएको थियो ।
वडा स्तरिय महिला सञ्जालका अध्यक्ष चेतना जोशीको अध्यक्षतामा भएको कार्यक्रममा वडा अध्यक्ष ललित बोगटी, वडा सदस्य उर्मिला खड्का, हस्त बहादुर भुल, मथुरा बिक, पूर्व वडा सदस्य शेर बहादुर बिक, बेताल माण्डौ माविका प्रधानाध्यापक धर्मेद्र बहादुर शाह, घुघुरकोट माविका प्रधानाध्यापक गोकुल शाह, निमित्त स्वास्थ्य चौकी इन्चार्ज ध्रुव बोहरा, सम विकास नेपालका पुन्ना कुँवर, वाक नेपालका अप्सरा बुढा महता र डिक्रा चाड लगायतको उपस्थिति रहेको थियो । सडक नाटक प्रतियोगिता कार्यक्रमको सञ्चालन वडा स्तरिय महिला सञ्जालका सचिव नितु खड्काले गर्नु भएको थियो ।
