साँफेबगरमा असोज ९ गते गणेश मेला न्याउले खेल सहित भव्य रुपमा मनाईने

स्थानीय समाचार

Home
स्थानीय समाचार
साँफेबगरमा असोज ९ गते गणेश मेला न्याउले खेल सहित भव्य रुपमा मनाईने

साँफेबगरमा असोज ९ गते गणेश मेला न्याउले खेल सहित भव्य रुपमा मनाईने

साँफेबगर ।

अछामको साँफेबगर नगरपालिका वडा नम्बर ४ एयरपोर्ट बजारमा रहेको गणेश मन्दिरमा हरेक वर्ष आयोजना हुँदै आएको गणेश मेला यस वर्ष पनि विविध कार्यक्र मसहित मनाईने भएको छ। साँफेबगरमा असोज ९ गते गणेश मेला न्याउले खेल सहित भव्य रुपमा मनाईने भएको हो।

साँफेबगर एयरपोर्ट बजार व्यवस्थापन समितिको आयोजनामा स्थानीय परम्परा र संस्कृतिको संरक्षण तथा प्रवर्द्धन गर्ने उद्धेश्यले आयोजना हुँदै आएको गणेश मेलामा गणेश भगवानको पूजा आराधनासँगै स्थानीय कला तथा संस्कृतिमा आधारित न्याउले र देउडा खेल लगायतका सांस्कृतिक कार्यक्रम सञ्चालन हुँदै आएका छन्।

साँफेबगर नगरपालिकामा अवस्थित गणेश मन्दिरमा यहि भदौ ३० गते गणेश चतुर्थीका दिन गणेशको मूर्ति स्थापना गरी नियमित पूजा आराधना गर्ने र गणेश चतुर्दशीका दिन विशेष पूजा सहित मेला आयोजना गरी मूर्ति विसर्जन गरिने छ।

बजार समितिका अध्यक्ष राम बहादुर कुँवरको अध्यक्षतामा बसेको बैठकमा जनप्रतिनिधि र बजारबासीको सहभागिता रहेको थियो। बैठकमा गणेश मेला भव्यताका साथ सम्पन्न गर्न मुल आयोजक समिति, आर्थिक समिति र पुजा समिति गठन गरिएको छ। आवश्यक समितिहरु अर्को बैठकमा गठन गरिने छ।

मेलामा साँफेबगर नगरपालिका तथा आसपासका क्षेत्रबाट ठूलो संख्यामा श्रद्धालु तथा स्थानीयवासी सहभागी हुने गरेका छन्। गणेश मेलाले धार्मिक आस्थासँगै स्थानीय मौलिक कला, संस्कृति र परम्पराको संरक्षणमा समेत योगदान पुर्‍याउँदै आएको छ।

यस वर्षको मेलालाई थप व्यवस्थित र आकर्षक बनाउन आयोजक तथा स्थानीयवासीले आवश्यक तयारी गरि रहेका छन्।

प्रकाशित मिति: आइतबार, भदौ २८, २०८३ १५:५०

प्रतिक्रिया दिनुहोस्