काठमाडौँ ।
मेटा (फेसबुक) ले टिकटक र युट्युब जस्ता प्रतिस्पर्धी प्लेटफर्महरूबाट स्थापित क्रिएटरहरूलाई आफ्नो प्लेट फर्ममा भित्र्याउन क्रिएटर फास्ट ट्र्याक (Creator Fast Track) नामक नयाँ कार्यक्रम सार्वजनिक गरेको छ । अन्य प्लेटफर्महरूमा पहिले नै ठुलो फलोइङ बनाइ सकेका क्रियटरहरूलाई फेसबुकमा नयाँ सुरुवात गर्न सहज बनाउने र उनीहरूको कमाई बढाउने उद्देश्यले यो मनिटाइजेसन कार्यक्रम ल्याइएको हो ।
नयाँ प्लेटफर्ममा शून्यबाट सुरु गर्नुपर्ने चुनौतीलाई सम्बोधन गर्दै यो कार्यक्रमले क्रियटरहरूलाई मुख्य दुई वटा सुविधाहरू प्रदान गर्नेछ । पहिलो सहभागी क्रियटरहरूले आफ्ना योग्य रिल्स (eligible reels) मा बढी रिच प्राप्त गर्नेछन् । जसले गर्दा उनीहरूको फलोअर्स सङ्ख्या छिटो बढाउन मद्दत पुग्नेछ । दोस्रोमा फेसबुकमा योग्य रिल्स शेयर गरे बापत सहभागीहरूलाई तीन महिनासम्म भुक्तानीको ग्यारेन्टी गरिनेछ ।
यस कार्यक्रम अन्तर्गत क्रियटरहरूले आफ्ना अन्य प्लेटफर्मका फलोअर्स सङ्ख्याका आधारमा निश्चित रकम (guaranteed pay) प्राप्त गर्न सक्नेछन् । यदि कुनै क्रियटरको इन्स्टाग्राम, टिकटक वा युट्युबमा कम्तीमा एक लाख फलोअर्स छन् भने उनीहरूले प्रति महिना एक हजार डलर कमाउन सक्छन् । यदि कुनै पनि एउटा प्लेट फर्ममा १० लाख (एक मिलियन) भन्दा बढी फलोअर्स छन् भने उनीहरूले प्रति महिना ३,००० डलरसम्म कमाउन सक्ने छन् ।
यस कार्यक्रमले योग्य क्रियटरहरूलाई फेसबुकको 'कन्टेन्ट मनिटाइजेसन' टुलमा तत्काल पहुँच दिनेछ । यसका लागि उनीहरूले फेसबुकको सामान्य मापदण्डहरू (जस्तै न्यूनतम फलोअर्स सङ्ख्या) पुरा गरीरहनु पर्ने छैन । यसले गर्दा 'क्रियटर फास्ट ट्र्याक' कार्यक्रम सकिए पछि पनि उनीहरूले आफ्ना सामग्रीबाट निरन्तर कमाई गरि रहन सक्ने छन् ।
फेसबुकले क्रियटर इकोनोमीमा आफ्नो लगानीलाई उल्लेखनीय रूपमा बढाएको छ । सन् २०२५ मा मात्र फेसबुकले आफ्ना मनिटाइजेसन कार्यक्रमहरू मार्फत क्रियटरहरूलाई झन्डै ३ अर्ब डलर भुक्तानी गरेको थियो, जुन अघिल्लो वर्षको तुलनामा ३५% बढी हो । यो फेसबुकको इतिहासकै सबै भन्दा उच्च वार्षिक भुक्तानी हो ।
तथ्याङ्क अनुसार गत वर्ष कूल भुक्तानीको ६०% हिस्सा रिल्सबाट भएको थियो भने बाँकी रकम स्टोरी, फोटो र टेक्स्ट पोस्टहरूबाट प्राप्त भएको थियो । फेसबुकमा वार्षिक १०,००० डलर भन्दा बढी कमाउने क्रियटरहरूको सङ्ख्यामा वार्षिक ३०% ले वृद्धि भएको कम्पनीले जनाएको छ ।
क्रियटरहरूलाई उनीहरूको कमाई बुझ्न र सामग्रीको प्रदर्शन सुधार गर्न फेसबुकले तीनवटा नयाँ मेट्रिक्सहरू पनि ल्याएको छ । जस अनुसार कमाईका लागि योग्य मानिने भ्युजहरूको सङ्ख्यालाई क्वालिफाइड भ्यूज (Qualified View) को रूपमा गणना गरिनेछ । त्यस्तै प्रति १,००० योग्य भ्युजमा हुने अनुमानित कमाईलाई अर्निङ रेट (Earnings Rate) को रूपमा जनाइनेछ ।
कुन भ्युजहरू आम्दानीका लागि किन योग्य भएनन् र भविष्यमा सुधार गर्न के गर्न सकिन्छ भन्ने विस्तृत जानकारी दिन नन-क्वालिफाइड भ्यूज (Non-qualified Views) मा देखाइनेछ ।
फेसबुकले अब मौलिक सामग्री (original content), इङ्गेजमेन्ट र लामो समयसम्म हेरिने (वाचटाइम) भिडिओहरूलाई बढी प्राथमिकता दिने बताएको छ ।
कसरी सहभागी हुने ?
फेसबुक कन्टेन्ट मनिटाइजेसन निमन्त्रणामा मात्र आधारित (invite-only) छ । इच्छुक क्रियटरहरूले फेसबुक मोबाइल एपको 'प्रोफेसनल ड्याशबोर्ड'मा गई 'मनिटाइजेसन' ट्याब भित्र रहेको 'कन्टेन्ट मनिटाइजेसन' मा गएर 'इन्ट्रेस्ट फर्म' (interest form) भर्न सक्नेछन् ।
फेसबुकका क्रियटर प्रोडक्ट उपाध्यक्ष याइर लिभ्नेका अनुसार यो कार्यक्रम विशेष गरी नयाँ प्लेट फर्ममा शून्यबाट कम्युनिटी बनाउन गाह्रो मान्ने स्थापित क्रियटरहरूको चिन्ता हटाउन डिजाइन गरिएको हो ।
