टेक राज भण्डारी, अछाम ।
अछामको मंगलसैन नगरपालिका ६ तेसिंगेमा रहेको गंगा माविमा कक्षा १० मा अध्ययनरत विद्यार्थीको बिदाई तथा फेरी भेटौँला कार्यक्रम गरिएको छ । कक्षा ९ मा अध्ययनरत विद्यार्थीहरुले उनीहरुको बिदाई गरेका हुन् । कक्षा ९ का विद्यार्थी पारस भण्डारीको अध्यक्षतामा भएको कार्यक्रममा प्रमुख अतिथि विद्यालय व्यवस्थापन समिति अध्यक्ष चक्र प्रसाद भण्डारी रहनु भएको थियो ।
प्रमुख अतिथि भण्डारीले गंगा माविमा अध्ययनरत सम्पूर्ण विद्यार्थीलाई एसईई परिक्षाको शुभकामना दिँदै आफुले सिकेको ज्ञान, सिपलाई उत्कृष्ठ तरिकाले परिक्षामार्फत व्यक्त गर्न आग्रह गर्नु भयो । कक्षा ११ मा शिक्षा र व्यवस्थापन संकायमा अध्ययन गर्न चाहेमा गंगा माविमै आउन समेत आग्रह गर्नु भयो ।
यस्तै विद्यालयका प्रधानाध्यापक मोतिराम भण्डारीले यो विदाई एक नियमित कार्यक्रम भएको र आगामी दिनमा कक्षा ११ मा अध्ययनका लागि आउने विद्यार्थीलाई स्वागत गर्न आफुहरु आतुर रहेको बताउनुभयो । कक्षा ११ र १२ लाई पनि गुणस्तरीय बनाउन विद्यालय प्रसाशन र व्यवस्थापन प्रतिबद्ध रहेको उहाँको भनाई छ ।
कार्यक्रममा विद्यालयका सहायक प्रधानाध्यापक टंक प्रसाद ढुंगाना, शिक्षकहरु बिक्रमसिंह विष्ट, युवराज मल्ल, टेक राज भण्डारी, विद्यार्थीहरु दिपिक्षा खत्री, चेतमान भण्डारी, डम्बर भण्डारी, चन्द्रकान्त भण्डारी लगायतले मन्तब्य राख्दै विद्यार्थीलाई शुभकामना दिनुभएको थियो । विद्यार्थीलाई अबिर, माला, मायाको चिनो प्रदान गर्दै बिदाई गरिएको थियो । कार्यक्रमको सञ्चालन कक्षा ९ का विद्यार्थी प्रेम प्रसाद भण्डारीले गर्नु भएको थियो ।
