साँफेबगर ।
अछामको साँफेबगरमा इलाका प्रशासन कार्यालय स्थापना गर्न माग गरिएको छ । सेवाग्राहीलाई सहज रुपमा प्रशासनको सेवा प्रवाह गर्न अछाम क्षेत्र नं. १ को साँफेबगरमा इलाका प्रशासन कार्यालय स्थापना गर्न माग गरिएको हो ।
इलाका प्रशासन कार्यालय स्थापनाका लागि पूर्व प्रधानमन्त्री तथा नेपाली काँग्रेसका सभापति शेर बहादुर देउवासँग अछामका जनप्रतिनिधिले छलफल गर्नुभएको हो ।
पालिका, जिल्ला समन्वय, जिल्ला प्रशासन, हुँदै विभिन्न संघीय मन्त्रालयहरुबाट फाईल स्वीकृतिका लागि अर्थ मन्त्रालयमा पुुगि सकेको जिल्ला समन्वय समिति अछामका प्रमुख ललित बहादुर कुँवरले बताउनु भयो । अर्थमा स्वीकृतिका लागि रोकि राखेको छ । कार्यालयको भौतिक संरचनाको लागि प्रक्रिया पनि अघि बढाईएको र पूर्व प्रधानमन्त्रीबाट फोन गराएर छिटो गराई दिनु पर्यो भनेर अनुरोध गरेका छौँ ।
कुँवरले भन्नुभयो–“अर्थले स्वीकृति प्रदान गरेर पठाए पछि अनि त्यसको प्रक्रिया अगाडि बढ्ने हो । इलाका प्रशासनलाई पछि तीन रोपनी जग्गा चाहिने हो तीन रोपनी जग्गा अब सल्लाह गरेर जहाँ उपयुक्त हुन्छ त्यहीँ सेरोफेरोमा उपलब्ध गराउने निर्णय गरेका छौँ ।” अछाम क्षेत्र नं. १ का नागरिकलाई जिल्ला प्रशासन कार्यालयबाट हुने सेवा प्रवाह इलाका प्रशासन कार्यालय स्थापना गरी सहज गरि दिन माग गरिएको थियो ।
जनताको घरदैलोमा सरल, सहज, सुलभ, झन्झट रहित एवं गुणस्तरीय सेवा गरी सङ्घीयताको अनुभूति गराउन इलाका प्रशासन कार्यालय स्थापना गर्नु पर्ने माग राखिएको कुँवरले बताउनु भयो । साँफेबगरमा इलाका प्रशासन कार्यालय नहुँदा जनतालाई सेवा लिन मंगलसेन धाउनु पर्ने बाध्यता भएकाले त्यसको अन्त्यका लागि पूर्व प्रधानमन्त्रीलाई भेट गरिएको समन्वय प्रमुख कुँवरले बताउनुभयो ।
साँफेबगर नगरपालिकाका नगर प्रमुख राजेन्द्र बहादुर कुँवरले जनतालाई सेवा लिन समस्या भई रहेकाले साँफेबगरमा इलाका प्रशासन कार्यालयको आवश्यकता देखिएकोले इलाका प्रशासन कार्यालय स्थापना गर्न माग राखिएको बताउनुभयो । कुँवरले सोमबार पूर्व प्रधानमन्त्री देउवासँग छलफल गरेर ईलाका प्रशासन कार्यलयको स्थापनाका लागि माग राखिएको बताउनुभयो ।
भेटमा पूर्व प्रधानमन्त्री देउवा ज्यूले थप छलफल गरी मन्त्री परिषद्मा प्रस्ताव लैजाने प्रतिबद्धता जनाएको उहाँले बताउनु भयो । कुँवरले भन्नुभयो–“अछाम जिल्लाबाट हामी यस अघी नै निर्णय गरेर पठाई सकेका थियौँ । त्यसलाई थप चाँडो भन्दा चाँडो फाईल अघी बढाई दिन अनुरोध गरेका छौँ र पार्टी सभापति ज्यूले पनि अर्थ मन्त्रालयमा रहेको फाईल अगाडि बढाईने प्रतिवद्धता जनाउनु भएको छ ।”
नागरिकता, पासपोर्ट, राष्ट्रिय परिचय पत्र लगायत अन्य कामका लागि मंगलसेन धाउनु पर्ने र महंगो पनि पर्ने भएको हुनाले अब जनतालाई सेवा सुविधा दिन इलाका प्रशासन कार्यालयको माग गरिएको चौरपाटी गाउँपालिकाका अध्यक्ष भीम बहादुर साउँदले बताउनु भयो ।
अछामको साँफेबगर नगरपालिका, चौरपाटी गाउँपालिका, बान्नीगढी जयगढ गाउँपालिका र मेल्लेख गाउँपालिका गरी चारवटा पालिकाका बासिन्दालाई सहज रुपमा सेवा प्रवाह गर्न साँफेबगरमा इलाका प्रशासन कार्यालय आवश्यक रहेकाले हामीले सोही आवस्यकतालाई मध्ये अगाडि बढेको उहाँले बताउनु भयो ।
भेटघाट तथा छलफलमा नेपाली कांग्रेसका केन्द्रीय सदस्य तथा पूर्व मन्त्री गोविन्द्र बहादुर शाह, जिल्ला समन्वय समिति प्रमुख ललित बहादुर कुँवर, साँफेबगर नगरपालिका प्रमुख राजेन्द्र बहादुर कुँवर, चौरपाटी गाउँपालिका अध्यक्ष भिम बहादुर साउँद, मेल्लेख गाउँपालिका उपाध्यक्ष नृप बहादुर खड्का लगायतका सरोकारवालाहरुको उपस्थिति रहेको थियो ।
