साँफेबगर ।
अछामको मेल्लेख गाउँपालिकाको निमित्त प्रमुख प्रशासकीय अधिकृतमा संगिता ताम्राकारले पदभार ग्रहण गर्नु भएको छ । आइतबार एक कार्यक्रमका बीच ताम्राकारले निमित्त प्रमुख प्रशासकीय अधिकृतको पदभार ग्रहण गर्नु भएको हो ।
गाउँपालिकाका अध्यक्ष ज्वाला सिं साउँदले मन्त्रालयले जिम्मेवारी दिएको पत्र ताम्राकारलाई हस्तान्त्रण गर्नु भएको छ । सो अवसरमा अध्यक्ष साउँदले खादा लगाएर ताम्राकारलाई बधाई ज्ञापन गर्दै पालिकामा सुशासन कायम गर्न महत्वपूर्ण भूमिका खेल्नेमा विश्वास व्यक्त गर्नु भयो ।
पदभार ग्रहण गर्दै ताम्राकारले जनप्रतिनिध, राजनीतिक दल, कर्मचारी, संचारकर्मी लगायत सबैको सहयोग भए मात्र प्रमुख प्रशासकीय अधिकृतले काम गर्न सक्ने बताउनु भयो । उहाँले आफू जिम्मेवारीमा रहँदासम्म मेल्लेखको विकास, सम्वृद्धि र सुशासनलाई प्राथमिकतामा राखेर काम गर्ने प्रतिवद्धता समेत व्यक्त गर्नु भयो ।
ताम्राकार अछामका स्थानीय तहहरुमा प्रमुख प्रशासकीय अधिकृतको जिम्मेवारी पाउने पहिलो महिला कर्मचारी हुनुहुन्छ । आर्थिक जिम्मेवारी सहित ताम्राकारलाई वरिष्ठतम कर्मचारीको आधारमा स्थानीय सरकार सञ्चालन ऐन–२०७४ को दफा ८४ को उपदफा (४) अनुसार संघीय मामिला तथा सामान्य प्रशासन मन्त्रालयले निमित्त प्रमुख प्रशासकीय अधिकृतको जिम्मेवारी दिएको हो ।
२०७६ सालमा स्थानीय सेवामा खुला तर्फ पहिलो प्रयासमै स्थायी जागिरमा प्रवेश गरेकी ताम्राकार प्रशासन तर्फको स्थायी भएपछि पहिलो पटक दार्चुलाको मार्मा गाउँपालिकामा कार्यरत हुनुहुन्थ्यो । त्यहाँबाट सरुवा भएर २०७९ देखि ताम्राकार मेल्लेखमा प्रशासन शाखा प्रमुखको रुपमा सेवा गर्दै आउनु भएको थियो ।
बान्नीगढी जयगढ गाउँपालिकाको जयगढमा रहेको सरस्वती माविबाट एसएलसी उत्तीर्ण गरेर कैलाली बहुमुखी क्याम्पसबाट स्नातकोत्तर तहसम्म उनले अध्ययन गर्नुभएको छ । पदभार ग्रहण कार्यक्रममा केशर बहादुर साउँद, गोकुश शाह, शिवराज खत्री लगायतले विभिन्न सुझाव सहित बधाई तथा कार्यकालको सफलताको शुभकामना दिनु भएको थियो ।
निमित्त प्रमुख प्रशासकीय अधिकृत संगिता ताम्राकार ।
