साँफेबगर ।
दिवा खाजा व्यवस्थापन सम्बन्धि अनुभव आदानप्रदान कार्यक्रम साँफेबगरमा सम्पन्न भएको छ । बझाङका चारवटा पालिकाबाट आएका जनप्रतिनिधि, कर्मचारी र साझदार संघसंस्थाहरुका पदाधिकारीसंग दिवा खाजा व्यवस्थापन सम्बन्धि अनुभव आदानप्रदान गरिएको हो ।
दिवा खाजा व्यवस्थापन सम्बन्धि अनुभव आदानप्रदान गर्न आएको टोलीले साँफेबगर नगरपालिका स्थित हातेमालो बहुउद्धेश्यीय सहकारी संस्थाले संचालन गरि रहेको दिवा खाजा व्यवस्थापनको अवलोकन गरेको थियो । अवलोकन पछि अनुभव आदानप्रदान कार्यक्रममा साँफेबगर नगरपालिकाले गरि रहेको क्रियाकलापको बारेमा नगरपालिकाको शिक्षा युवा तथा खेलकुद शाखा प्रमुख हिरादत्त भट्टले जानकारी गराउनु भएको थियो ।
उहाँले पालिका, वडा तथा विद्यालय स्तरीय दिवा खाजा समिति गठन, किसानहरुलाई दिवा खाजासंग आवद्ध गरिएको जानकारी गराउनु भएको थियो । यस्तै उहाँले किसानहरुबाट विद्यालयमा दिवा खाजा आपूर्ति हुने गरेको, सबै विद्यालयमा भान्सा, भाडाकुडा उपलब्ध रहेको बताउनु भयो ।
आफ्नो अनुभव राख्दै हातेमालो बहुउद्धेश्यीय सहकारी संस्थाका अध्यक्ष सुरत भुलले सहकारीले नगरपालिका र वाक नेपालसंगको साझेदारीमा कोल्ड चेब्मर निर्माण गरेर किसानले उत्पादन गरेर ल्याएका तरकारी र फलफूलहरु राख्ने गरेको बताउनु भयो । यस्तै उहाँले विद्यार्थि संख्या र विद्यालयले माग गरे अनुसार दिवा खाजााक लागि खाद्यन्न उपलब्ध गराउँदै आएको बताउनु भयो । उहाँले आफूहरुले असहजताका वाबजुद पनि विद्यालयमा दिवा खाजाका लागि खाद्यन्न उपलब्ध गराईदै आएको बताउनु भएको छ ।
उहाँले सहकारीले पनि आफैले विषदी रहित तरकारी र खाद्यन्न उत्पादन गरेर दिवा खाजाका लागि विद्यालयमा उपलब्ध गराएको बताउनु भयो । दिवा खाजा व्यवस्थापन सम्बन्धि अनुभव आदानप्रदान कार्यक्रमका सहभागिहरुले स्वास्थ तथा उत्पादनका हिसाबले उपयुक्त भएता पनि असल व्यवस्थापन तथा समय समयमा सुपरिवेक्षण, विद्यालयको अपनत्व तथा सहकारीको नियमन गर्न सके स्थानीय उपजमा आधारित दिवाखाजा प्रभाकारी हुने बताएका थिए ।
साँफेबगर नगरपालिकाका नगर उपप्रमुख शिव बहादुर कुँवरको अध्यक्षतामा भएको दिवा खाजा व्यवस्थापन सम्बन्धि अनुभव आदानप्रदान कार्यक्रममा जयपृथ्वी नगरपालिकाका नगर प्रमुख चेतराज बजाल, छविस पाथिभेरा गाउँपालिकाका अध्यक्ष बसन्त चलाउने, केदारस्युँ गाउँपालिकाका उपाध्यक्ष मनिषा धामी, तलकोट गाउँपालिकाका उपाध्यक्ष पार्वती कुँवर भण्डारी लगायतले आफ्नो अनुभव राख्नु भएको थियो ।
कार्यक्रममा वाक नेपालका अध्यक्ष मिन बहादुर कुँवर, अछाम तथा बझाङ जिल्लाबाट आएका जनप्रतिनिधि, कर्मचारी, बहुउद्धेश्यीय विकास समाजका पदाधिकारी, हातेमालो बहुउद्धेश्यीय सहकारी संस्थाका पदाधिकारी र कर्मचारीहरुको सहभागिता रहेको थियो ।
दिवा खाजा व्यवस्थापन सम्बन्धि अनुभव आदानप्रदान कार्यक्रमको सञ्चालन साँफेबगर नगरपालिका शिक्षा युवा तथा खेलकुद शाखा प्रमुख हिरादत्त भट्टले गर्नु भएको थियो ।
