साँफेबगर ।
अछामको साँफेबगर नगरपालिकाले साँफे हाटबजारका आगलागी पीडितलाई राहत वितरण गरेको छ । बिहिबार साँफेबगर नगरपालिका वडा नं. ३, हाटबजारमा वैशाख १३ गते बिहान भएको आगलागीमा परेका पीडितहरुलाई राहत वितरण गरिएको हो ।
साँफेबगर नगरपालिका वडा विपद राहत वितरण उपसमितीका संयोजक एवम् साँफेबगर नगरपालिका वडा नं. ३, का अध्यक्ष कुल बहादुर कुँवरको अध्यक्षतामा भएको राहत वितरणमा प्रमुख अतिथि साँफेबगर नगरपालिकाका कार्यबाहक नगर प्रमुख शिव बहादुर कुँवरले आगलागी पिडितलाई राहत हस्तान्तरण गर्नु भएको थियो ।
शनिबार विहान भएको आगलागीबाट गंग कुँवरको कालभैरव सन्स एण्ड जनरल स्टोर, प्रेम खड्काको शुभेच्छा ममः सेन्टर, गिता कठायत कुँवरको पक्की घर, भीम कुँवरको रोड साईड रेष्टुरेन्ट, दिपक सुनारको कालभैरव सुनचाँदी पसल, ज्ञानेन्द्र कुँवरको बैजनाथ कम्प्यूटर, टीका कुँवरको टीका फेन्सीएण्ड व्युटी पार्लर, सुरेस कुँवरको शितल नास्ता पसल, किशोर भाटको मदिरा पसल, मक्र कुँवरको रिभर साईड नास्ता पसल, सुमन कुँवरको राज्यश्वरी कृषि तथा पशुपछि फर्म जलेर नष्ट भएका थिए ।
राहत वितरणमा साँफे हाटबजार व्यवस्थापन समितिका सचिव अशोक कुँवरले बजार व्यवस्थापन समितिले पनि बजारबाट राहत संकलन गरेको र केहि फर्महरु बाँकी रहेकोले केहि दिनमै उक्त राहत वितरण गरिने बताउनु भयो ।
राहत वितरण गर्दै साँफेबगर नगरपालिकाका नगर प्रमुख कुँवरले नगरपालिकाले पीडितको क्षतिको पूर्ण रुपमा पुर्ति गर्न नसके पनि स्थानीय सरकारले वर्तमान परिस्थीतिलाई मध्ये नजर गर्दै तत्कालका लागि राहत सहयोग गरिएको बताउनु भायो ।
यस्तै साँफेबगर नगरपालिका वडा नं. ३, का वडा अध्यक्ष कुल बहादुर कुँवरले तत्काल स्थानीय सरकारले घोषणा गरेको ६ लाख रकम भएको क्षतिपूर्ति र संरचनाको मापदण्ड अनुसार रातह वितरण गरिएको बताउनु भयो । राहत वितरण कार्यक्रमको संचालन साँफेबगर नगरपालिकाका स्वास्थ्य शाखा प्रमुख लक्षमण नाथ योगीले गर्नु भएको थियो ।
वैशाख १३ गते हाटबजारको शुभेच्छा मम सेन्टरमा विजुली सर्ट भई आगलागी हुँदा १० पसल जलेर नष्ट भएका थिए । प्रहरीको तथाक अनुसार आगलागीबाट ३ करोड ८६ लाख ६५ हजारको क्षति भएको जनाईएको छ ।
