कमलबजार ।
निमार्ण कार्य थालनी भएको ३२ वर्ष पछि अछामको कमलबजार विमानस्थलमा व्यावसायिक उडान सुरु भएको छ । कमलबजार नगरपालिका, मंगलसेन नगरपालिका, पञ्चदेवल विनायक नगरपालिका, रामारोशन गाउँपालिका, ढकारी गाउँपालिका र तुर्माखाँद गाउँपालिकाको संयुक्त पहल र सहयोगमा कमलबजार विमानस्थलमा व्यवसायिक उडान सुरु भएको हो ।
यस अघि फाल्गुन २५ गते देखि नियमित उडान हुने भनिएता पनि सो दिन मौसम प्रतिकुल भए पछि पहिलो उडान नै अवरुद्ध भएको थियो । निमार्ण कार्य थालनी भएको ३२ वर्ष पछि गत पुस १३ गते तारा एयरको विमानले कमलबजार विमानस्थलमा परीक्षण उडान गरेको थियो । हाललाई हप्तामा एक दिन, आइतबार मात्र उडान हुने सम्झौता अनुसार व्यवसायिक उडान सुरु भएको कमलबजार नगरपालिकाका नगर प्रमुख यज्ञ प्रसाद ढकालले बताउनु भयो ।
आईतबार कमलबजार नगरपालिकाका नगर प्रमुख यज्ञ प्रसाद ढकाल, उपप्रमुख शारदा कुँवर लगाएत १५ सो जहाजमा सवार हुनुहुन्थ्यो भने, जहाज फर्किने बेला पनि १५ जना यात्रु लिएर उक्त जहाज नेपालगञ्जका लागि उडेको थियो । नेपालगञ्ज देखि कमलबजार सम्म २५ मिनेको समय लागेको नगर प्रमुख ढकालले बताउनु भयो । उक्त टुईनेटर विमान पाईलट क्याटेन संजिव श्रेष्ठ, वि सुब्बा र एयर ट्राफिक कन्ट्रोलर कृष्ण कुमार शाहले उडाउनु भएको थियो ।
आईतबार तारा एयरको नाईनएन–एईभी टुईनेटर जहाजले आफ्नो व्यवासायिक उडान गरेको हो । काठमाडौँ–कमलबजार, कमलबजार–काठमाडौँको लागि ११ हजार रुपियाँ र नेपालगञ्ज–कमलबजार, कमलबजार–नेपालगञ्जको लागि ६ हजार पाँच सय रुपियाँ भाडा दर कायम भएको छ । यात्रुको सहजताका लागि निकट भविष्यमा ई–सेवा र खल्ती एप मार्फत समेत टिकट काट्ने व्यवस्था मिलाईने गरि तयारी भई रहेको नगर प्रमुख ढकालले बताउनु भयो । कमलबजार विमान स्थलमा हवाईजहाज आउने भए पछि जहाज हेर्न हजारौँको संख्यामा स्थानीयहरुको भीड लागेको थियो ।
एक कार्यक्रम बिच संस्कृति पर्यटन तथा नागरिक उड्ययन राज्य मन्त्री अरुण कुमार चौधरीले विमानस्थलको उद्घाटन गर्नु भयो । मन्त्री चौधरीले कमलबजार विमानस्थलको पिच गर्न र नियमित उडान गर्न भरपुर प्रयास गर्ने बताउनु भयो । कमलबजार नगरपालिकाका नगर प्रमुख यज्ञ प्रसाद ढकालको अध्यक्षतामा भएको कार्यक्रमका प्रमुख अतिथि संस्कृति पर्यटन तथा नागरिक उड्ययन राज्य मन्त्री अरुण कुमार चौधरी रहनु भएको थियो ।
प्रमुख अतिथिको आशनबाट बोल्दै मन्त्री चौधरीले जहाजको व्यवसायिक उडान सुरु गरे संगै यस क्षेत्रको पर्यटन प्रवर्द्धनमा टेवा पुग्ने विश्वास व्यक्त गर्नु भयो । उद्घाटन कार्यक्रममा अछाम क्षेत्र नम्बर २ का प्रतिनिधि सभा सदस्य पुष्प बहादुर शाह, निवर्तमान सांसद राम बहादुर बिष्ट, नेपाल कांग्रेसका युवा नेता गणेश बिष्ट लगायतले शुभकामना मन्तव्य राख्नु भएको थियो ।
कमलबजार नगरपालिकाका नगर उपप्रमुख शारदा बिष्ट कुँवरले स्वागत मन्तव्य राख्नु भएको उद्घाटन कार्यक्रमको सञ्चालन कमलबजार नगरपालिकाका योजना तथा प्रशासन शाखा प्रमुख अधिकृत खड्ग बहादुर बिष्टले गर्नु भएको थियो ।
