काठमाडौं ।
सेयर कारोबारको पहिलो दिन नेप्से परिसूचक दोहोरो अंकले घटेको छ। यसदिन नेप्से ३९.४० अंकले ओरालो लागेर २६ सय ९३।१० विन्दुमा अडिएको छ। नेप्से घटेसँगै कारोबार रकम पनि ४ अर्बमा सिमित भयो। २३० कम्पनीको ७१ लाख २२ हजार २९९ कित्ता सेयर ४ अर्ब ८ करोड ६४ लाख ७४ हजार ८२८ रुपैयाँमा कारोबार भयो। यस्तै सेन्सेटिभ इण्डेक्स पनि ४.९९ अंकले घटेर ५१३.६४ विन्दुमा पुगेको छ।
यसअघि साताको अन्तिम कारोबार दिन बिहीबार नेप्से परिसूचक १.९३ प्रतिशतले घटेर २७ सय ३२.५२ विन्दुमा अडिएको थियो। सामान्य अंकले नेप्से घटेसँगै सेयर कारोबार रकम निकै संकुचन आएको थियो। यसदिन २२७ कम्पनीको ४० लाख १७ हजार ४२९ कित्ता सेयर २ अर्ब २७ करोड ८१ लाख ७३ हजार ६६० रुपैयाँमा कारोबार भएको थियो।
आइतबार कारोबारमा आएका १३ समूहमध्ये १२ को सूचक ओरालो लागेको छ। १२ समूहको सूचक ओरालो लाग्दा अन्य समूहको मात्र सूचक ०.४२ प्रतिशतले बढेको हो। यसदिन जीवन विमाको सर्वाधिक २.४४ प्रतिशतले सेयर मूल्य घट्दा मनु एन्ड प्रोको २.३७, निर्जीव विमाको २.२५, वित्त समूहको २.०२ प्रतिशतले सूचक घटेको छ। यस्तै व्यापारको १.९५,बैंकिङको १.४७, होटल तथा पर्यटनको १.४३, लगानी समूहको १.८८ प्रतिशतले सूचक घटेको हो।
आज एउटा मात्रै कम्पनीको सेयर सकारात्मक सर्किट लेभलमा कारोबार भयो। युनाइटेड इदी (मार्दी एन्ड आरबी हाइड्रोपावरको सेयर मूल्य १० प्रतिशतले बढेको हो। यस्तै तेह्रथुम पावरको ८.६४ प्रतिशतले सेयर मूल्य बढेको छ।
कारोबार रकमका आधारमा जीवन विकास लघुवित्तीय अग्रस्थानमा रह्यो। सो कम्पनीको ५८ करोड २ लाख २३ हजार ४५० रुपैयाँमा सेयर कारोबार भयो।
(अन्नपूर्ण अनलाइनबाट साभार)
