काठमाडौं ।
नेपाल आइडलको शुक्रबारको एपीसोड नेपाल बाहिर रहेर नेपाली गीतसंगीतको गरिमा बढाउने सर्जकप्रति समर्पित थियो। तीनै प्रवासी नेपाली सर्जकद्वारा विभिन्न कालखण्डमा सिर्जित नेपाली गीत आइडलको पन्चमा घन्किएका थिए।
अतिथि थिए, प्रवासी गायक पुष्पन प्रधान र आइडल सिजन २ का उत्कृष्ट ५ मा पुग्न सफल अमित बराल। पहिलो प्रस्तुति लिएर आए, नाम्गेल तामाङ। उनले ‘मुसुमुसु हाँसी देऊन लै लै’ गाएर सबैलाई नचाए। त्यसपछि ‘बोलाउँ भने तिमीलाई पाप लाग्ने डर’ भन्दै रञ्जित नेपाली मञ्चमा आए। सुमेन पाख्रिनले ‘देउराली पाखा भिरालो’ गाइन् । भूपेन्द्र थापामगरले ‘सानी लथालिंग भो जिन्दगानी’ बोलको गीत गाए। निर्णायक सुवानी मोक्तानले उनको उच्च प्रशंसा गरेकी थिइन्। हरेक हप्ता कम भोट आउने एक जना प्रतियोगी बाहिरिने गर्छन्। शुक्रबार उत्कृष्ट ८ प्रतियोगीले गाएका थिए। हरेकको प्रस्तुति हेर्न लायक थियो। आफूलाई अब्बल सावित गर्न अनेक कोसिस गरिरहेका थिए। प्रतियोगीहरू गीत गाउने मात्रै हैन, नाच्ने र अनुहारको एक्सप्रेसनमा पनि ख्याल गरिरहेका थिए। गीतको भावसँगै डुबिरहेका थिए। जतिजति अगाडि बढ्दै गयो कार्यक्रम उत्तिकै कडा प्रतिस्पर्धा देख्न सकिन्छ। शुक्रबार यस्तै धमकेदार प्रस्तुति दिइन्, वेनिशा पौडेलले। उनले ‘सम्हालेर राख’ गाएर मन्त्रमुग्ध बनाइन्।
नेपाल आइडलका निर्णायक र अतिथिले प्रतिस्पर्धीको प्रशंसा गर्थे। प्रतिस्पर्धीहरू आफ्नो प्रस्तुति दिएपछि आफूलाई भोट गर्न अपिल गर्थे। पछिल्लो समय सन्तानले बाबुआमालाई भुल्दै गएको, एक्लै छाडेको प्रशस्तै सुन्न सकिन्छ। यस्तै भाव बोकेको ‘बाबाको टोपी गन्हायो रे तिमीलाई’ गाएर माहोल भावुक बनाए, विश्वास उप्रेतीले। त्यसपछि लक्ष्मी पौडेल खुला किताबको कथा लिएर आइन्। ‘एउटा खुला किताब हुँ म तिमीले पनि पढे हुन्छ’ भनेर अब्बल गाइन्। शुक्रबार अन्तिम प्रस्तुति दिए कानदेन लिम्बूले। ‘सानैदेखि देखेको मैले दार्जिलिङ सहर’ बोलको गीत गाएर पहाडकी रानीको उपमा पाएको दार्जिलिङको सुन्दरताको बयान गरे। शुक्रबारको कोकाकोला पफमेन्स आफ द विक लक्ष्मी पौडेल भइन्।
अतिथि अमित बरालले ‘म आगो भएको बेला’ बोलको आफ्नो नयाँ गीत गाएका थिए। पुष्पन प्रधानले ‘कसरी भन्नु ठूल्दाजु उसले देश बनाउँदैन’ गीत आएर अर्थपूर्ण सन्देश दिए। पुष्पनको गीतले हाम्रो समाजको कथा बोकेको निर्णायक शम्भुजित बाँस्कोटाले बताए। ‘तपाईंले समाज गाउँनुभो। समाज बोल्नुभयो,’ बाँस्कोटाले भने, ‘भित्र हृदयबाट सम्मान गर्न चाहान्छु।’ पुष्पनले आफू यो ठाउँमा पुग्नुमा नेपाल आइडलकै कारण पुगेको बताए। आइडलका निर्देशक तथा प्रोजेक्ट हेड सुरेश पौडेलका अनुसार चैतको पहिलो हप्ता नेपाल आइडल सिजन ४ को विजेता घोषणा हुनेछ।
(अन्नपूर्ण अनलाइनबाट साभार)
