साँफेबगर ।
अछामको साँफेबगर नगरपालिका भित्र रहेका सार्वजनिक संस्थाहरुमा स्तनपान कक्ष निर्माण तथा सञ्चालनको माग गर्दै नगर प्रमुख राजेन्द्र बहादुर कुँवरलाई ज्ञापन पत्र बुझाईएको छ। पालिका स्तरीय दलित सञ्जाल र पालिका स्तरीय खाद्य अधिकार सञ्जाल साँफेबगरको संयुक्त पहलमा बिहीबार नगर प्रमुख कुँवरलाई ज्ञापन पत्र बुझाईएको हो।
ज्ञापन पत्र मार्फत वडा कार्यालय, विद्यालय, स्वास्थ्य संस्था तथा अन्य सार्वजनिक सेवा प्रवाह गर्ने कार्यालयहरुमा स्तनपानमैत्री वातावरण निर्माण गरी स्तनपान कक्ष स्थापना गर्न माग गरिएको छ। ज्ञापन पत्रमा नेपाल सरकारद्वारा जारी स्तनपान प्रवर्धन तथा मातृत्व सुरक्षा कार्यान्वयन निर्देशिका, २०७५ अनुसार सार्वजनिक तथा निजी कार्यालयहरुमा स्तनपानमैत्री वातावरण निर्माण तथा स्तनपान कक्षको व्यवस्था गर्नु पर्ने कानुनी प्रावधान रहेको उल्लेख गरिएको छ।
तर साँफेबगर नगरपालिका भित्रका अधिकांश सार्वजनिक संस्थाहरुमा यस्तो व्यवस्था नदेखिएको भन्दै आवश्यक पहल गर्न आग्रह गरिएको छ। सञ्जालहरूले सार्वजनिक सेवा लिन आउने महिला तथा सुत्केरी आमाहरुलाई सहज वातावरण उपलब्ध गराउन नगरपालिका भित्रका सम्पूर्ण वडा कार्यालय, सामुदायिक तथा संस्थागत विद्यालय, स्वास्थ्य चौकी, आधारभूत स्वास्थ्य सेवा केन्द्र, अस्पताल तथा अन्य सार्वजनिक सेवा केन्द्रहरमा स्तनपान कक्ष निर्माण तथा सञ्चालनको व्यवस्था गर्न माग गरेका छन्।
त्यसै गरी स्तनपान कक्ष निर्माण गर्दा राष्ट्रिय मापदण्ड पालना गर्नु पर्ने, स्तनपानमैत्री कार्यस्थल तथा सार्वजनिक संस्थाको अवधारणा कार्यान्वयनका लागि आवश्यक नीति तथा कार्यविधि निर्माण गर्नु पर्ने, निर्माण तथा सञ्चालनका लागि बजेट विनियोजन गर्नु पर्ने र नियमित अनुगमनको व्यवस्था मिलाउनु पर्ने माग पनि ज्ञापन पत्रमा समेटिएको छ।
महिलाको सम्मान, शिशुको स्वास्थ्य अधिकार तथा पोषण सुधारलाई प्रवर्धन गर्ने उद्धेश्यले नगरपालिकाको वार्षिक नीति, योजना तथा बजेटमा स्तनपानमैत्री संरचना निर्माणलाई प्राथमिकतामा राख्न समेत सञ्जालहरुले आग्रह गरेका छन्। ज्ञापन पत्रको बोधार्थ उपप्रमुख तथा प्रमुख प्रशासकीय अधिकृतलाई समेत दिईएको छ। स्थानीय तहमा महिलामैत्री तथा बालमैत्री सेवा प्रवाह सुनिश्चित गर्न स्तनपान कक्ष स्थापना आवश्यक रहेको भन्दै सरोकारवालाहरुले यस विषयलाई प्राथमिकताका साथ अघि बढाउनु पर्ने बताएका छन्।
