साँफेबगर ।
अछामको साँफेबगर नगरपालिकालाई पूर्ण खोप सुनिश्चितता तथा दिगोपना नगरपालिका घोषणा गरिएको छ। नगर भित्रका खोप लगाउने उमेर समुहका ९९९ बालबालिकाले राष्ट्रिय खोप तालिका अनुसार आवश्यक खोप प्राप्त गरेको सुनिश्चित भए पछि नगरपालिकालाई पूर्ण खोप सुनिश्चितता तथा दिगोपना नगरपालिका घोषणा गरिएको हो।
स्वास्थ्य कार्यालयको नियमित कार्यक्रम अनुसार हरेक वर्ष बालबालिकाले खोप प्राप्तीको सुनिश्चितता भए पछि पालिकालाई पूर्ण खोप पालिका घोषणा गरिदै आएको छ। घोषणा कार्यक्रममा बोल्दै साँफेबगर नगरपालिकाका नगर प्रमुख राजेन्द्र बहादुर कुँवरले पूर्ण खोप सुनिश्चितता नगरपालिका घोषणा गर्न महत्वपूर्ण भूमिका निर्वाह गर्ने स्वास्थ्यकर्मी, जनप्रतिनिधि तथा सरोकावालाहरुलाई धन्यवाद व्यक्त गर्नु भयो।
उहाँले बालबालिकालाई विभिन्न रोगबाट सुरक्षित राख्न खोप कार्यक्रम प्रभावकारी रहेको बताउँदै आगामी दिनमा पनि खोपको दिगोपनामा विशेष ध्यान दिनु पर्नेमा जोड दिए। स्वास्थ्य कार्यालय अछामका प्रमुख झपटराज ढुंगानाले पूर्ण खोप सुनिश्चितता घोषणा केवल औपचारिकता नभई बालबालिकाको स्वास्थ्य सुरक्षासँग जोडिएको महत्वपूर्ण उपलब्धि भएको बताउनु भयो।
उहाँले नियमित खोप कार्यक्रमलाई अझ प्रभावकारी बनाउँदै प्रत्येक बालबालिकाको पहुँचमा स्वास्थ्य सेवा पुर्याउन सबै पक्षले सहकार्य गर्नु पर्ने धारणा राख्नु भयो। कार्यक्रममा उपप्रमुख शिव बहादुर कुँवर शिलोज, प्रमुख प्रशासकीय अधिकृत अर्जुन सेन ओली, विभिन्न वडाका जनप्रतिनिधि, विषयगत शाखाका प्रमुख, स्वास्थ्यकर्मी तथा सरोकारवालाहरुको सहभागिता रहेको थियो।
कार्यक्रमको उद्देश्यका वारेमा स्वास्थ्य शाखा प्रमुख लक्ष्मणनाथ योगीले जानकारी गराएका थिए। नगरपालिकालाई पूर्ण खोप सुनिश्चितता तथा दिगोपना घोषणा गर्न योगदान पुर्याएका स्वास्थ्यकर्मीहरुलाई कार्यक्रममा सम्मान समेत गरिएको थियो।
नियमित खोप कार्यक्रमलाई सफल बनाउन, खोपबाट वञ्चित बालबालिकाको खोजी गर्न, समुदाय स्तरमा जनचेतना फैलाउन तथा पूर्ण खोप सुनिश्चितता अभियानमा सक्रिय भूमिका निर्वाह गरेको योगदानको कदर स्वरुप स्वास्थ्यकर्मीहरुलाई सम्मान गरिएको जनाईएको छ। कार्यक्रम सञ्चालन स्वास्थ्य शाखाका नरेश रावतले गर्नु भएको थियो।
