साँफेबगर ।
अछाम जिल्लाको साँफेबगर नगरपालिकाले जडान गरेका सिसिटिभि तीन दिनमै बिग्रिएका छन्।
नगरपालिकाले वडा नम्बर ३ हाटबजारको बैद्यनाथ प्रवेशद्धार, प्रभालि गाडमा रहेको पक्किपुल नजिक, जिरो प्वाईन्ट र मंगलसेन, बाजुरा छुट्टीने सडक बुढीगंगा पक्की पुल र साँफेबगर नगरपालिका वडा नम्बर ४ एयरपोर्ट बजारको जनकल्याण माध्यमिक विद्यालय, महालक्ष्मी विकास बैंकको अघाडि सडक छेउ, छिपेखोला बाईपास चोक आसपास, छिपेखोला पक्की पुल जाने मोड क्षेत्र गरी ८ ठाउँमा असार पहिलो साता सिसिटिभि क्यामेरा जडान गरेको थियो।
तर जडानको तीन दिनमै क्यामेराले काम गर्न छोडे पनि हालसम्म भने क्यामेरा मर्मत भएका छैनन्। साँफे एयरपोर्ट बजारमा जडान गरिएका चार मध्ये तीन वटा सिसिटिभिले काम नगरेको जनकल्याण टोलमा जडान गरेको क्यामेरा मात्रै काम गरि रहेको त्यो पनि विधुत भएका बेला मात्रै काम गर्ने गरेको ईलाका प्रहरी साँफेबगरका प्रहरी निरीक्षक खगेन्द्र साउँदले बताए। यस्तै साँफे हाट बजारमा रहेका चार मध्ये दुई वटाले मात्रै काम गरि रहेको छ।
क्यामेरा काम नगरेको भनेर वडा अध्यक्षलाई र नगर प्रमुखलाई जानकारी गराउँदा समेत हालसम्म मर्मत नगरिएको जडान गर्ने भरत कडायतलाई पटक–पटक फोन गर्दा नउठाउने गरेको प्रहरी निरीक्षक साउँदले बताए।
साँफे हाटबजारमा रहेका चार वटा सिसिटिभि क्यामेराको निगरानी जिल्ला ट्राफिक कार्यालय साँफेबगरबाट र एयरपोर्ट बजारमा रहेका चार वटा क्यामेराको निगरानी इलाका प्रहरी कार्यालय साँफेबगरमा रहेका छन्। नगरपालिकाले सिसीटिभि क्यामरा जडानका लागी २०७८ मा नै ८ लाख ५० हजार भुक्तानी गरे पनि जडान गरेको थिएन।
विभिन्न संचार माध्यम सिभिटिभि जडानको लागि पैँसा भुक्तानी भए पनि जडान नभएको भन्दै समाचार प्रकाशित भए पछि २०८१ असारमा नगरपालिकाले जडान गरेको थियोे।
