अछाम ।
सरकारले नागरिकको गुणस्तरीय स्वास्थ्य सेवामा पहुँच र उपयोगमा सुधार ल्याई स्वास्थ्य बिमा कार्यक्रम लागू गरेको छ। तर नागरिकले भने अझै चाँसो दिएको पाईदैन। साँफेबगर नगरपालिका भने स्वास्थ विमा कार्यक्रमलाई प्रभावकारी बनाउनको लागि कडाईका साथ अघि बढेको छ । जनप्रतिनिधि देखि कर्मचारीको तलब देखि सेवा सुविधा र आम नागरिकको सबै सेवा सुबिधा रोक्ने निर्णय गरेको छ ।
नगरपालिकाको नवौं कार्यपालिकाको बैठकबाट नागरिकले सार्वजनिक सेवा प्राप्त गर्दा अनिवार्य स्वास्थ विमा हुनु पर्ने निर्णय गरेको थियो । त्यस्तै कार्यालयबाट कुनै पनि नागरिकले सार्वजनिक सेवा प्राप्त गर्दा अनिवार्य रुपमा नगरपालिकालाई सम्पत्ति कर, व्यवसाय कर तथा राजस्व चुक्ता गरेको कागजात भए मात्र सेवा प्रदान गर्ने निर्णय गरेको छ।
कार्यपालिकामा भएको निर्णयलाई थप प्रष्ट पार्दै साँफेबगर नगरपालिकाका नगर प्रमुख कुल बहादुर कुँवरले नगरपालिका अन्तर्गतका जनप्रतिनिधी तथा कर्मचारीहरुलाई फागुन १५ गते भित्र आफ्नो र घरपरिवारको स्वास्थ्य विमा गर्न निर्देशन दिनुभएको छ । आईतवार पत्रकार सम्मेलनको आयोजना गरि उक्त समयावधि भित्र स्वास्थ्य विमा नगरेमा नगरपालिकाबाट प्राप्त गर्ने र प्राप्त गर्दै आईरहेका सबै प्रकारका सेवा सुविधा, तलब भत्ता रोकिने जानकारी दिनुभयो ।
यस्तै सेवाग्राही नागरिकको हकमा पनि फागुन १५ गतेसम्म स्वास्थ विमा नगरेमा नगरपालिका तथा वडा कार्यालयहरुबाट प्रवाह गरिने सार्वजनिक सेवा उपलब्ध गराउन नगरपालिका तथा वडा कार्यालय बाध्य हुने छैन, नगर प्रमुख कुँवरको भनाई रहेको छ। नगर प्रमुख कुँवरले चाँडै नगरपालिका भित्र कार्यरत सार्बजनिक निकाएलाई पत्र काटेर स्वास्थ विमा गर्नको लागि आग्रह गर्छौ । त्यो समयभित्र नगर्नेको पनि सिफारिस देखि भुक्तानी रोक्छु नगर प्रमुख कुँवरले भन्नुभयो ।
स्वास्थ्य विमामा सबै नागरिकहरुको पहुँच अभिवृद्धि गर्ने उद्देश्यले जेष्ठ नागरिक, गरिब घरपरिवार पहिचान अन्तर्गत अति गरिबको सूचीमा परेका घर परिवार, “क” वर्गको परिचय पत्र प्राप्त अपाङ्गता भएका व्यक्ति, क्षयरोग, कुष्ठरोग, एच।आइ।भी।÷एड्स रोगबाट ग्रसित भई नियमित औषधी सेवन गरिरहेका व्यक्ति र महिला स्वास्थ्य स्वयंमसेविकाको नेपाल सरकारले नै स्वास्थ्य विमा गरिदिने व्यवस्था रहेको सम्बन्धित सबैमा जानकारी गराउन चाहान्छु पत्रकार सम्मेलन पछि जारी गरिएको प्रेस विज्ञप्तिमा भनिएको छ ।
स्वास्थ्य विमा कार्यक्रमलाई यस नगरपालिकामा प्रभावकारी रुपमा कार्यान्वयन गर्न नगरपालिका स्थित वित्तीय संस्था, आयोजना, निगम, प्राधिकरण, सुरक्षा निकाय, सङ्घीय तथा प्रदेश कार्यालयहरु र गैरसरकारी संघ संस्थामा कार्यरत सबै कर्मचारीहरुको अनिवार्यरुपमा स्वास्थ्य विमा गरेको कागजातको आधारमा मात्र नगरपालिका तथा वडा कार्यालयहरुबाट सेवा सुविधा प्राप्त गर्न सकिने भएकोले सबैले आ–आफ्नो स्वास्थ्य विमा गर्नुहुन अनुरोध गर्दछु जारी प्रेस विज्ञप्तिमा भनिएको छ ।
स्वास्थ्य विमा गर्नको लागि प्रति ५ जनाको परिवारलाई बार्षिक तीन हजार पाँच सय र ५ जना भन्दा माथि प्रति जना सात सय को दरले थप हुँदै जाने, विमा वापतको सुविधा ५ जना परिवारको लागि एक लाख सम्मको हुने तथा प्रति जना बिस हजारको दरले विमा सुविधा रकम थप हुँदै जाने व्यहोरा समेत यसै विज्ञप्ती मार्फत सम्बन्धित सबैमा जानकारी गराउँदछु भनिएको छ । साँफेबगर नगरपालिकामा अहिलेसम्म ४ हजार ७ सय १५ जनाले स्वास्थ विमा गरेका छन् ।
