मेल्लेख।
अछामको मेल्लेख गाउँपालिका वडा नम्बर २ ऋषिदहमा गैर सरकारी संस्था सहयोग इकाई स्थापना गरीएको छ। ऋषिदहमा हाल कार्यक्रम संचालन गरी रहेका संस्थाहरुका लागि २ नम्बर वडा कार्यालयद्वारा गैर सरकारी संस्था सहयोग इकाई स्थापना गरी एक कार्यक्रमका बिच हस्तान्तरण गरिएको हो।
वाक नेपालको विशेष पहलमा अछामको एउटा दुर्गम ठाउँको वडा सरकारले प्रत्येक संस्थाका अलग–अलग टेबुल तथा सुझाव पेटिका सहित वाईफाई, फोटोकपी तथा प्रिन्ट मेशिन राखेर पक्की भवनमा गैर सरकारी संस्था सहयोग इकाई स्थापना गरेकोमा अछाम जिल्लामै विल्कुलै नविनतम र प्रसंशनीय कार्य गरेको भन्दै गैर सरकारी संस्थाका प्रतिनिधिहरुले खुसी व्यक्त गरेका छन्। कार्यक्रममा सम्पूर्ण गैर सरकारी संस्थाहरुको तर्फबाट बोल्दै वाक नेपालका भुपेन्द्र भण्डारीले हामी संस्थाहरूलाई वडा कार्यालयकै छाना मुनी राखेर अभिभावकत्व दिएको बताउनु भयो।
उहाँले गैर सरकारी संस्था सहयोग इकाई कार्यालय मात्रै नभई हामी संस्थाहरुका लागि वडा कार्यालयले दिएको माया भएको बताउनु भयो। उहाँले यो सम्मान हो र बासस्थान हो भन्ने कुरा राख्नु भएको थियो। त्यस्तै वडा अध्यक्ष कुशलराज बुढाले गैर सरकारी संस्थाका प्रतिनिधिलाई स्वागत गर्दै अब संस्थाबाट दिईने सेवा सुविधा समुदायमा कसैलाई काखा पाखा नगरी पाउनै पर्नेले पाउने र संस्था तथा वडाले आर्थिक तथा सामाजिक हिसाबमा पनि हातेमालो गरेर अघि बढ्नु पर्ने तथा यो गैर सरकारी संस्था सहयोग इकाईले वडा कार्यालय, गैर सरकारी संस्था र वडावासीहरुलाई जोड्ने पुलको काम गर्ने भएकोले आफ्नो तर्फबाट हुने सहयोगमा कुनै पनि कञ्जुस्याइँ नहुने भन्दै यो सहकार्यका लागि सबै संस्थाहरू लाई धन्यवाद समेत दिनु भएको छ।
वडा अध्यक्षद्वारा गैर सरकारी संस्था सहयोग इकाईको बोर्ड उच्चारण गरेर तथा वाक नेपाल, आस्था नेपाल र सेवक नेपालका प्रतिनिधिलाई कार्यालयको साँचो हस्तान्तरण गरेर कार्यक्रम उद्घाटन गरिएको थियो। मेल्लेख गाउँपालिका वडा नम्बर २ का वडा अध्यक्ष कुशलराज बुढाको अध्यक्षतामा संचालन भएको कार्यक्रममा नवनिर्वाचित जनप्रतिनिधिहरु, पूर्व जनप्रतिनिधिहरु, शिक्षक, समाजसेवी, बुद्धिजीवी तथा वाक नेपाल, आस्था नेपाल र सेवक नेपालका प्रतिनिधिहरु लगायतको उपस्थिति रहेको थियो। कार्यक्रमको संचालन वडा सहायक धन बहादुर बुढाले गर्नु भएको थियो।
