मेल्लेख ।
अछामको मेल्लेख गाउँपालिकालाई बालमैत्री स्थानीय शासनयुक्त पालिका घोषणा गर्ने उद्देश्यले लगानी योजना तथा घोषणा पूर्वको रणनीति योजना निर्माण सम्बन्धी कार्यशाला सम्पन्न भएको छ।
मेल्लेख गाउँपालिकाको आयोजनामा आगामी २०८३ भदौ ९ गते अछामको मेल्लेख गाउँपालिकामा कार्यशाला सञ्चालन गरिएको छ। बाल विवाह अन्त्यका लागि आवश्यक नीति, कार्यक्रम, लगानी तथा कार्ययोजना निर्माण गरी गाउँपालिकालाई बाल विवाहमुक्त बनाउने अभियानलाई थप प्रभावकारी बनाउने उद्देश्यले कार्यशाला आयोजना गरिएको हो।
कार्यशालामा बाल विवाह न्यूनीकरण तथा अन्त्यका लागि गाउँपालिकाले आगामी दिनमा गर्नु पर्ने कार्यक्रम, आवश्यक स्रोत–साधन, सरोकारवाला निकाय बीचको समन्वय तथा जिम्मेवारीका विषयमा छलफल गरिएको छ। साथै बाल विवाह रहित गाउँपालिका घोषणा गर्नु अघि पूरा गर्नु पर्ने आधार तथा सूचकहरुको अवस्था पहिचान गरी आवश्यक रणनीति तय गरिएको छ।
मेल्लेख गाउँपालिकाले पछिल्लो समय बालमैत्री स्थानीय शासन तथा बाल अधिकारका क्षेत्रमा विभिन्न गतिविधि सञ्चालन गर्दै आएको छ। गाउँपालिकाको आधिकारिक समाचार पोर्टलमा समेत बाल विवाहलाई शून्यमा झार्ने विषयमा सरोकारवालाको प्रतिबद्धता तथा बालमैत्री स्थानीय शासन सम्बन्धी गतिविधि सार्वजनिक भएका छन्।
कार्यशालामा जनप्रतिनिधि, कर्मचारी, महिला तथा बालबालिका क्षेत्रमा कार्यरत संस्था, विद्यालय, अभिभावक, बालबालिका तथा अन्य सरोकारवालाको सहभागिता रहने बताईएको छ। बाल विवाह सामाजिक, आर्थिक तथा शैक्षिक कारणसँग जोडिएको विषय भएकाले यसको अन्त्यका लागि स्थानीय तह, समुदाय, विद्यालय, अभिभावक र बालबालिकाको संयुक्त प्रयास आवश्यक रहेकोमा जोड दिईनेछ।
कार्यशालाका लागि वर्ल्ड भिजन र आस्था नेपालले सहयोग/साझेदारी गर्ने आयोजकले जनाएको छ। कार्यशालाबाट तयार हुने लगानी तथा रणनीतिक योजनाले मेल्लेखलाई बाल विवाह रहित गाउँपालिका घोषणा गर्ने अभियानलाई व्यवस्थित रुपमा अघि बढाउन आधार तयार गर्ने विश्वास गरिएको छ।
मेल्लेख गाउँपालिकाको चालु आवधिक योजना २०८२/८३–२०८६/८७ तथा वार्षिक नीति तथा कार्यक्रम समेत गाउँपालिकाको विकास र सामाजिक रुपान्तरणका लागि आधारका रुपमा अघि बढाईएका छन्।
बाल विवाह अन्त्यका लागि केवल घोषणा गर्ने भन्दा पनि घोषणा पछि समेत अभियानलाई निरन्तरता दिने, बालबालिकाको शिक्षा र संरक्षण सुनिश्चित गर्ने तथा समुदाय स्तरमा सचेतना बढाउने विषयलाई योजनामा प्राथमिकता दिनु पर्ने सरोकारवालाको अपेक्षा छ।
मेल्लेखलाई बाल विवाह रहित गाउँपालिका घोषणा गर्ने तयारी बैठक गाउँपालिकाका उपाध्यक्ष निर्प बहादुर खड्काको अध्यक्षता र प्रमुख अतिथि पालिका अध्यक्ष ज्वाला सिंह साउँदले गर्नु भएको थियो भने उद्देश्य तथा स्वागत आस्था नेपालका परियोजना अधिकृत तपेन्द्र ठकुला र कार्यक्रमको सञ्चालन आस्था नेपालका कर्मचारी भ्वान सिंह सार्कीले गर्नु भएको थियो।
