साँफे हाटबजारमा आगलागि

स्थानीय समाचार

Home
स्थानीय समाचार
साँफे हाटबजारमा आगलागि

साँफे हाटबजारमा आगलागि

खप्तड समाचारदाता आइतबार, कात्तिक १६, २०८२

साँफेबगर ।

अछामको प्रमुख व्यापारीक केन्द्र साँफेबगर नगरपालिका वडा नम्बर ३ स्थित हाटबजारमा शनिबार राति आगलागी भएको छ । आगलागीमा परी ७ वटा पसल पूर्ण रुपमा जलेर खरानी बनेका छन् । स्थानीयहरुका अनुसार, आगो करिब पौने ९ बजे तिर सुरु भएको थियो ।
गत वैशाख १३ गते यसै स्थान नजिकै आगलागी भएर ठूलो क्षति भएको थियो । छ महिनामै दोस्रो पटक लागेको आगलागीले बजारका व्यापारीहरु पुनः शोकमा डुबाएका छन् । सुरक्षा निकाय र स्थानीय बासिन्दाले निर्माण व्यवसायी गौतम कुँवरको जेसिबी र ईन्दसरा आयल स्टोरको पानी ट्याङ्करको सहायतामा करिब डेढ घण्टा पछि आगो नियन्त्रणमा लिन सफल भएका थिए ।

आगलागीबाट जलेर नष्ट भएका पसलहरुमा अशोक कुँवरको जुता पसल, महेन्द्र कार्कीको किराना पसल, वल बहादुर कुँवरको होटेल, सुमन कुँवर (ईभी) को काण्टर÷डोका डाला पसल, कर्ण कुँवरको अग्रोभेट सेन्टर, वैद्यनाथ फेन्सी स्टोर, र नर बहादुर गिरीको सिलाई–कटाई पसल रहेका छन् ।

प्रारम्भिक अनुसन्धान अनुसार, विद्युत् सर्ट भएका कारण आगलागी भएको जिल्ला प्रशासन कार्यालय अछामले जानकारी दिएको छ । संयुक्त प्रयासले आगो नियन्त्रणमा लिए पनि पसल भित्रका सामान जोगाउन भने सकिएन । प्रारम्भिक अनुमान अनुसार, आगलागीबाट लाखौँ रुपैयाँ बराबरको धनमाल नष्ट भएको छ । स्थानीय प्रशासनले पीडित व्यापारीहरुलाई राहत र क्षतिको विवरण संकलन कार्य अघि बढाएको जनाएको छ । यस अघि बैशाखमा पनि उक्त क्षेत्र नजिकै आगलागि भएको थियो ।