साँफेबगर ।
अछामको साँफेबगर नगरपालिकाका विभिन्न स्वास्थ्य चौकीहरुले विश्व स्तनपान सप्ताह गरेका छन् । साउन १६–२२ गतेसम्म विविध कार्यक्रमहरु गरी सप्ताह भव्य रुपमा सम्पन्न गरेका हुन् ।
“स्तनपानलाई प्राथमिकता दिऔं सहयोगी वातावरण निर्माण गरौं” भन्ने नाराका साथ स्वास्थ्य चौकी तथा वडा कार्यालयको आयोजना तथा समविकास नेपाल, पीसविन नेपाल, र वाक नेपालको साझेदारीमा पोषण सुरक्षा सुधारका लागि जलवायु उत्थानशिल कृषि प्रणालीमा महिलाहरुको सहभागिता परियोजनाको कार्यक्षेत्र साँफेबगर नगरपालिका वडा नं. २ , ३, ९ , १० ११ , १२ र १४ मा कार्यक्रम सम्पन्न गरिएको हो ।
सुनौला हजार दिनका आमाहरु,आमा समुहका प्रतिनिधिहरु, स्वास्थ्य स्वयं सेविका, स्थानीय अगुवा, विद्यालयका प्रतिनिधि ,समुदायका सदस्यहरु, सम विकासका प्रतिनिधिहरु र जनप्रतिनिधिहरुको सक्रिय सहभागितामा विश्व स्तनपान सप्ताह सम्पन्न भएको हो ।
कार्यक्रम अन्तर्गत आमा समूहहरूसँग अन्तक्रिया कार्यक्रम, नवआगन्तुक आमाहरुका लागि स्तनपान सम्बन्धी परामर्श सेवा, हात धुने तरिका, हरेकबार खाना चार र समुदायमा जनचेतनामूलक र्याली संचालन गरिएको थियो । कार्यक्रममा स्वास्थ्यकर्मीहरुले स्तनपानका महत्व, शिशु स्वास्थ्यमा यसको प्रभाव, र आमाहरुले भोग्ने चुनौतीहरु माथि प्रकाश पारेका थिए ।
स्वास्थ्य चौकी प्रमुखहरुले पहिलो ६ महिना पूर्ण स्तनपान र त्यस पछि २ वर्षसम्म निरन्तर स्तनपान गर्नु शिशुको शारीरिक तथा मानसिक विकासका लागि अत्यन्त आवश्यक छ । हामीले यो सन्देश समुदायमा पुर्याउने उद्धेश्यले सप्ताह भरी जनचेतनामूलक गतिविधिहरु सञ्चालन गरेका हौं भन्ने कुरा व्यक्त गरेक छन् ।
कार्यक्रममा स्थानीय जनप्रतिनिधिहरुले पनि स्तनपान प्रवद्र्धनमा स्वास्थ्य चौकीको पहलको सराहना गर्दै यस्ता कार्यक्रमले आम समुदायमा सकारात्मक प्रभाव पार्ने विश्वास व्यक्त गरेका छन् । त्यसै गरी परियोजनाको कार्यक्षेत्र अन्तरगत चौरपाटी गाँउपालिका वडा नं. ४, ५ र ६ मा पनि स्तनपान सप्ताह विभिन्न क्रियाकलाप गर्दै सम्पन्न गरिएको छ ।
स्तनपान सप्ताह मनाउने क्रममै साँफेबगर नगरपालिका वडा नं. ९ का विभिन्न टोलका आमा समुहहरुले नेपाल सरकारद्वारा जारी “स्तनपान प्रवद्र्धन तथा मातृत्व सुरक्षा कार्यान्वयन निर्देशिका, २०७५“ अनुसार, सबै सार्वजनिक तथा निजी कार्यालयहरूमा स्तनपान मैत्री वातावरण निर्माण गर्नुका साथै स्तनपान कक्षको व्यवस्था गर्नु अनिवार्य गरिएको स्पष्ट व्यवस्था विद्यमान भएता पनि हाल वडा कार्यालय, विद्यालय, स्वास्थ्य संस्था तथा अन्य सार्वजनिक स्थलहरुमा स्तनपान कक्ष नभएको सन्दर्भमा ज्ञापन पत्र वडा अध्यक्षलाई बुझाएका छन् । सो ज्ञापन पत्रमा लेखिएको छ कि “यो ज्ञापन पत्र वडा अध्यक्ष मार्फत नगरपालिकासम्म प्रस्तुत गरि दिनु हुन हार्दिक अनुरोध गर्दछौं यसबाट पालिकाका अन्य वडामा पनि अन्य संस्थामा स्थनपान कक्ष स्थापना गर्न सहज होस भन्ने अपेक्षा गरेका छौ । हामी, मातृ–शिशु स्वास्थ्य, पोषण तथा स्तनपान अधिकारको प्रवद्र्धनमा संलग्न स्थानीय सरोकारवाला पक्षहरु वडा तथा नगरपालिकाबाट सकारात्मक पहल, सहयोग र दीर्घकालीन प्रतिबद्धताको अपेक्षा गर्दछौं ।
यसले आमाहरुलाई सुरक्षित र गोप्य वातावरणमा स्तनपान गराउने वातावरण सिर्जना गर्न सहयोग पुग्नेछ । तसर्थ, स्तनपान सप्ताहको अवसरमा आवस्यक स्थानहरुमा स्तनपान केन्द्र स्थापना गर्न वडा अध्यक्षको सक्रिय पहलका लागि हार्दिक अनुरोध गर्दछौ । ”स्तनपान सप्ताह सफलतापूर्वक सम्पन्न गर्न सहयोग गर्ने सम्पूर्ण सरोकारवाला तथा सहभागीहरूलाई स्वास्थ्य चौकी प्रमुखहरुले धन्यवाद ज्ञापन गरेको छन् ।
