साँफेबगर ।
नेकपा एमाले साँफेबगर नगर कमिटीको बैठक विभिन्न निर्णय गर्दै सम्पन्न भएको छ ।
शनिबार नगर कमिटी अध्यक्ष हिरण्ड बहादुर कुँवरको अध्यक्षतामा भएको बैठकले पार्टीबाट निर्वाचित पार्टीको विधि विधान अनुसार नचल्ने जनप्रतिनिधिहरुलाई कारबाही गर्ने निर्णय गरेको छ । उक्त बैठकको निर्णयमा उल्लेख भए अनुसार नेकपा एमालेबाट निर्वाचित जनप्रतिनिधिहरुले पार्टीको विधि विधान अनुसार नचली आफ्नो मनपरी ढंगले चल्ने, पार्टीका कार्यक्रममा उपस्थित नहुने र पार्टीलाई फाईदा नभई घाटा, क्षेति हुने काम गर्ने जनप्रतिनिधिलाई कारबाही गर्ने निर्णय गरिएको हो ।
बैठकको निर्णय अनुसार पार्टीलाई यस्ता विभिन्न आघात पुग्ने काम गर्ने जनप्रतिनिधिलाई स्पष्टीकरण सहितको जवाफ माग्ने र चित्त बुझ्दो जवाफ नआएमा यसै बैठकलाई आधार मानेर कारबाही प्रक्रिया अगाडि बढाईनेछ । यस्तै बैठकले नेकपा एमाले साँफेबगरको पार्टी कार्यालय निर्माणका लागि पार्टीको जिल्ला कमिटी, विभिन्न व्यक्ति, संघसंस्था, सरकारका विभिन्न निकायलाई सहयोगका लागि अनुरोध गर्ने निर्णय गरेको छ ।
बैठकद्धारा पार्टीको सदस्यता नवीकरण गर्न बाँकी रहेका सदस्यहलाई नवीकरण गर्न अनुरोध गर्ने, नगरका १४ वटै वडाका वडा कमिटीहरुको गतिविधिका बारेमा जानकारी लिने लगायतका निर्णयहरु गरिएको जनाईएको छ।
बैठकका प्रमुख अतिथि नेकपा एमाले जिल्ला कमिटी सचिव हिरण्ड भट्टराई रहनु भएको थियो । प्रमुख अतिथि भट्टराईले नेकपा एमालेका विभिन्न संगठन शुद्धिकरण र सुदृढीकरणका साथै विस्तारमा लाग्नु पर्ने आजको आवश्यकता भएको बताउनु भएको छ ।
उहाँले केही मान्छेहरुले बाटो विरायर गए पनि उहाँहरुको अन्तिम विन्दु नेकपा एमाले नै रहने बताउनु भयो । यस्तै प्रमुख अतिथि भट्टराईले पार्टी निर्माणका लागि हिजो पनि सबैको अपरिहार्य भुमिका रहेको र भोली पनि उतिकै भुमिकाको आवश्यकता रहने औंल्याउनु भयो ।
यस्तै प्रमुख अतिथि भट्टराईले पार्टीलाई आवश्यक सहयोग, पार्टीको परामर्श, सुझाव, सल्लाह विधि विधान नमान्ने, पार्टीका निर्णयहरु कार्यान्वयनमा अटेर गर्ने र पार्टीलाई हानी नोक्सानी पुर्याउने पार्टी भित्र बसेर अनुशासन र कर्तव्यको पालना नगर्नको नगत संकलन गर्न र स्थानीय कमिटीबाट निर्णय गरि जिल्लामा पठाउन हुन निर्देशन दिनु भयो ।
उहाँले यसको आफुले निर्णय मर्म अनुसार गर्न आफू नहिच्किचाउने र मोलाहिजा नगर्ने बताउनु भयो । उहाँले यो निर्णय साँफेमा मात्र नभएर जिल्ला भरि लागु हुने पनि बताउनु भयो ।
बैठकका विशिष्ठ अतिथि केन्द्रीय विभाग सदस्य देव बहादुर कुँवर रहनु भएको थियो । यस्तै बैठकमा जिल्ला कमिटी सदस्य पुष्पराज भट्ट, जितेन्द्र कुँवर, श्याम रावल, सर्जन परियार, पूर्व जिल्ला कमिटी सदस्य रमेश कुँवर, प्रहरी तथा सैनिक संगठन संयोजक देव बहादुर कुँवर, पूर्व जिल्ला कमिटी सल्लाहकार सदस्य पूर्ण बुढा, नेकपा एमाले वडा नम्बर १ का वडा कमिटी अध्यक्ष तिलक शाह, वडा नम्बर ४ मण्टामाण्डौंका अध्यक्ष भक्त बहादुर भण्डारी, वडा नम्बर १० घुघुरकोटका अध्यक्ष गोरख महता, वडा नम्बर १२ खप्तडका अध्यक्ष दिपक रावल, वडा नम्बर १३ बाब्लाका अध्यक्ष लोकेन्द्र बिष्ट, पूर्व नगर कमिटी सदस्य दिलिप बोगटी, सोवराज उपाध्याय लगायतको उपस्थिति रहेको थियो ।
बैठकको संचालन नगर कमिटी सचिव भिम बडाहितले गर्नु भएको थियो ।
