साँफेबगर ।
गैर सरकारी संस्था महासंघ अछाम शाखाको अध्यक्षमा पुनः बल बहादुर केसी चयन हुनु भएको छ । २३ औँ साधारण सभा एवं ९ औं जिल्ला अधिवेशनबाट बुधबार साँफेबगरमा सम्पन्न भएको अधिवेशनबाट अध्यक्षमा केसी चयन हुनु भएको हो । ९ औं जिल्ला अधिवेशनबाट केसी र्निविरोध निर्वाचित हुनु भएको हो ।
समितिको उपाध्यक्षमा ढकेन्द्र कुँवर, सचिव कृष्ण प्रसाद देवकोटा, कोषाध्यक्ष पवन गिरी र उपसचिवमा गणेश तिरुवा चयन हुनु भएको छ । यस्तै सदस्यमा अप्सरा कुँवर, गणेश कुँवर, टंक बोहरा, खेम प्रसाद भट्टराई, सिता कुँवर र रेडियो जनप्रिय एफएमका समाचार प्रमुख कल्पना बोहरा चयन हुनु भएको हो ।
गैसस महासंघ अछामका अध्यक्ष बल बहादुर केसीको अध्यक्षतमा भएको उद्घाटन कार्यक्रमका प्रमुख अतिथि गैर सरकारी संस्था महासंघका केन्द्रीय अध्यक्ष अर्जुन भट्टराई रहनु भएको थियो । उद्घाटन कार्यक्रममा बोल्दै केन्द्रीय अध्यक्ष भट्टराईले अब निजी क्षेत्र, सरकार र नागरिक समाजले सँगसँगै जानु पर्नेमा जोड दिनु भयो । उहाँले सामाजिक रुपान्तरण हरेक अभियानमा गैससको भूमिका महत्वपूर्ण रहेको धारणा व्यक्त गर्नु भयो ।
उहाँले दुःख र अप्ठेरो परेको बेला जन्मिएको संस्थाले समुन्नत नेपाल निर्माण गर्नमा महत्वपूर्ण भूमिका खेलेको बताउनु भयो । उहाँले गैर सरकारी संस्था महासंघले सुशासन र शान्ती कायम गर्नका लागि सबैलाई खबरदारी गर्न आवश्यक रहेको औंल्याउनु भयो ।
कार्यक्रममा विशिष्ट अतिथि साँफेबगर नगरपालिकाका नगर प्रमुख राजेन्द्र बहादुर कुँवरले स्थानीय सरकार गैसससँग सहकार्य गर्न इच्छुक रहेको धारणा व्यक्त गर्नु भयो । साँफेबगर नगरपालिकाले पनि गैसससँग मिलेर रुपान्तरणका कार्यक्रम गर्दै आएको धारणा व्यक्त गर्नु भयो ।
२३ औँ साधारण सभा एवं ९ औं जिल्ला अधिवेशनमा साँफेगर नगरपालिकाका उपप्रमुख शिव बहादुर कुँवर शिलोज, संघका महासचिव देवि खड्का, उपमहासचिव भवराज रेग्मी, जिल्ला समन्वय समिति अछामका सदस्य नरेन्द्र बहादुर कुँवर, पूर्व केन्द्रीय सचिव प्रकाश शाह, केन्द्रीयय सदस्य एवं सुदूरपश्चिम इन्चार्ज प्रेम महर, सुदूरपश्चिम सहइन्चार्ज पशुपति कुँवर, सुदूरपश्चिम अध्यक्ष देवि खनाल लगायतको सहभागिता रहेको थियो ।
गैसस अछामका उपाध्यक्ष ढकेन्द्र कुँवरले स्वागत मन्तव्य राख्नु भएको कार्यक्रमको सञ्चालन कोषाध्यक्ष पवन गिरीले गर्नु भएको थियो ।
